Tomas Myller refuzon Murinjon: Do të qëndroj tek Bayern Munchen

Sulmuesi i kombëtares gjermane, Tomas Myller, i cili shënoi 5 gola në Botëror, nuk është joshur nga oferta e portugezit Hose Murinjo për t''u bashkuar me Realin e Madridit, pasi ka shprehur besnikërinë ndaj klubit bavarez Bayern Munchen.
“Për mua gjëja më e rëndësishme është progresi im i mëtejshëm si lojtar. Unë kam kushte të shkëlqyera për ta bërë këtë te Bajerni dhe nëse vazhdoj të përparoj, kjo do të thotë se edhe Bajerni do të jetë i suksesshëm. Për këtë arsye nuk mendoj fare për t’u transferuar në ndonjë skuadër tjetër. Normalisht askush nuk mund të garantojë se do të luaj gjithmonë te Bajerni. Për momentin duhet të mbaj këtë nivel loje me vite. Nëse ndokush do të më thoshte se unë do të luaja për Bajernin në dhjetë vitet e ardhshme, atëherë unë do të nënshkruaja menjëherë”, ka theksuar Myller.
Drejtori sportiv i Bajernit, Kristian Nerlinger, ka bërë të ditur se së shpejti Myllerit do t’i ofrohet kontrata e re, pasi drejtuesit e klubit janë të vetëdijshëm se interesimi i klubeve gjigante evropiane për shërbimet e këtij futbollisti është i madh.
“Çdokush është i lumtur kur bosi i tyre dëshiron t’i ofrojë një rritje page, por ajo që më pëlqen më shumë është se deklaratat e tilla më bëjnë të ndihem shumë i çmuar për klubin pas edicionit tim të parë. Ky është nder për mua”, ka nënvizuar Myller.